Әдебиетке әрдайым адал болсын

Қайран, Махаң... Болмысы бекзат, бітімі бөлек, жазуы ерек, жаны жайсаң, алты алашқа ардақты, қалың қазаққа қадірлі қаламгер еді.

Осы Түркістан өңірінің әдебиеті туралы әңгіме бола қалса алдымен тілге Мархабат Байғұт есімі оралатыны анық.
Қайбір жылы Шымшаһардың төрінде менің шығармашылық кешім өтіп, оны қазақтың көркемсөз зергерi Мархабат Байғұт жүргiздi. Мархабат аға сөздің майын тамыза отырып, көрерменді де жалықтырмай шығармашылығымның әр кезеңін әдемі әзілімен жеткізіп, жылы естелiктермен бөлiскен болатын. Ерекше әсерге бөлеген Шымкенттегі сол шығармашылық кешімді әлі күнге сағынышпен еске аламын. Одан кейін де осынау қасиетті өлкеге жолым түскен сайын мейлінше Махаңа жолығып, сыр-сұхбатқа шақырып, әңгіме-дүкен құруға тырысатынмын. 
Оңтүстіктің ырысы мен ынтымағының ұйтқысы бола білген ардақты азамат қазақ әдебиетіне де адалдығымен ерекшеленді. Міне, енді Түркістанның жігіттері осындай асыл азаматтың есімін жаңғыртып, «Мархабат» деген журнал ашып жатыр екен. 
Әрине, әдебиетсүйер қауым «Қасым», «Мұқағали» деген журналдардың бар екенін жақсы біледі. Бұлардың әрқайсысы әдебиет әлемінде қатар жүзіп келе жатқанымен әр журналдың өзіндік өрнегі, өзіндік стилі болуы керек деп ойлаймын. 
Ендеше «Мархабат» журналы да өзіндік ерекшелігімен, әдебиетке деген адалдығымен оқырмандарын қуанта бергей. Ең бастысы таралым жағынан ешқашан тарықпасын.

Ұлықбек ЕСДӘУЛЕТ,
ақын, ҚР Мемлекеттiк сыйлығының лауреаты