Журналдың жаңа атауы жанымды жылытты

Ғажайып шығармаларымен қазақ әдебиетінің тарихында қалған тұлғаларымыздың бірі -- шығармашылығы мен адами қасиеті жаныма жақын көрнекті жазушы Мархабат Байғұт ағамыз. 
Оңтүстікте, шырайлы Шымқалада тұрып қазақ оқырмандарына, түркі жұртына классикалық туындылар ұсынған қаламгер ағамызға деген құрметіміз тіршілігінде бөлек болды. Түрлі форматтағы әдеби жиындарда әріптестері Махаңның мінбеге көтеріліп, көрікті ойларымен бөлісуін қалап тұратын. Аяулы жазушы да көп сөйлей бермейтін. Сөйлей қалса қысқа-нұсқа ойлары ондыққа тиіп жататын. 
Мақамы бөлек маңғаз ағаның шығармаларын оқыған сайын ауылға барып қайтқандай күй кешемін. Қысқа әңгімелерінен тазалықтың, ізгіліктің жұпар лебі аңқиды. Зер салып зерттегенге Алаш ардақтысы Бейімбет Майлинның шығармаларындай шағын көлеммен үлкен проблеманы жеткізе білген. 
Жаңа жылдан бастап республика оқырмандарына жол тартқалы тұрған әдеби журналдың «Мархабат» деп аталуы жанымды жылытты. Жазушының туындылары секілді журналдың да ғұмыры өміршең болса екен деген тілегімді айтқым келеді. Өйткені, тұлғалардың атымен аталатын журналдардың көбі жарты жыл, бір жылдан соң шығарылымы тоқтап қалып жүрген мысалдар аз емес. “Мұқағали”, “Қасым” секілді журналдар ғана қазіргі таңда өміршеңдігін жоғалтпай келеді. 
Сондықтан, “Мархабат” журналына да ұзақ ғұмыр, құрылтайшыларына күш-қуат тілейміз! 
Алдағы уақытта жаны жайсаң ағаның шығармалары жас буынға, әдебиетсүйер қауымға осы басылым арқылы кеңінен тарай берсін. Журнал ұжымының жұмысына шығармашылық табыс және сәттілік тілеймін.

Жанарбек ӘШІМЖАНОВ,
ақын, ҚР Парламент Мәжілісінің депутаты, 
Қазақстанның еңбек сіңірген қайраткері