Жазғандары ел жүрегіне ұя салған
Әдебиет жерге, руға бөлінбейді. Әдебиет бәріне ортақ. Қазақтың көрнекті жазушысы, ҚР Еңбек сіңірген қайраткері Мархабат Байғұттың есімі, шығармашылығы жамбылдық оқырмандарға да кеңінен таныс.
Тіпті жазушының шығармаларында Жамбыл облысындағы тарихи жер атаулары, ауыл аттары жиі кездесетіні, қаламгердің өзі бала кезінде Жуалының түкпіріндегі мектепте аз ғана уақыт білім алғандықтан әңгімелерінде осы өлкенің тыныс-тіршілігі мен адамдары әдемі көрініс тапқанын әулиеаталықтар мақтанышпен айтады. Одан бертінде Мархабат Байғұт республикалық «Егемен Қазақстан» газетінің Оңтүстік Қазақстан, Жамбыл және Қызылорда облыстарындағы арнаулы тілшісі қызметін атқарып жүрген кезде де жыр алыбының есімімен аталатын
облыстың қайнаған тіршілігі еліміздің бас басылымында жиі жарық көріп жатты.
Иә, Мархабат Байғұт өз оқырманын тапқан жазушы. Және жазғандары ел жүрегіне ұя салған аса дарынды қаламгер қазақтың мұңын мұңдап, жоғын жоқтаған қайраткер тұлға болды.
Сондықтан «Мархабат» атты журналдың жарық көргелі жатқаны туралы хабарды Жамбыл жұрты да қуанышпен қабылдады. Берісі – алты алашқа, арысы – бүкіл түркі дүниесіне танымал болған сыршыл қаламгердің есімін иеленген басылымның алар асуы биік болсын. Барша оқырманның сүйікті журналына айнала берсін.
Жамбыл облысының әкімі Ербол Қарашөкеевтің тікелей ұйытқы болуымен шығармашыл жастардың әлеуетіне жаңа леп беру мақсатында 2025 жылды «Кітап оқу жылы» деп жарияланып отыр. Осының аясында «Әулиеата – кітап оқитын өңір» жобасы бастау алмақ. Яғни, жастарды кітап оқуға баулу, жаппай кітап оқитын ұлтқа айналу, жас ұрпақты әдебиетке қызықтыру бағытындағы жұмыстарды жандандыруда «Мархабат» журналының да көмегі зор болатыны анық.
Жаңа басылымның жаңа қадамы құтты болсын!
Серік СӘЛЕМОВ,
Жамбыл облысы әкімінің орынбасары
