Оңтүстік десе еске бірден Махаң түседі

Мархабат Байғұт -- парасат пайымы, түсінігі, кісілігі қабат келіп отыратын, елдің, жұрттың қадір-қасиетін білетін жазушы еді.

Өзіндік жазу стилі бар, ешкімге еліктемеген, шығармаларында тұңғиық ойы мен шынайы сезімі менмұндалап тұратын сыршыл қаламгер болатын. Әлі күнге Оңтүстік десе еске бірден Махаң түседі.
Міне, сол оңтүстіктің азаматтары Махаңдай мықты жазушыны ардақтап, «Мархабат» деген журнал ашып, есімін мәңгі есте қалдыруға әрекет жасап жатыр екен. Лайым, оңынан болсын.
Әрине, елімізде шығып жатқан әдеби журналдардың алды-арты бұл емес. Әдебиет алыптарының есімімен аталатын бірнеше басылымдар бар. Әрқайсысы әдебиет айдынында шама-шарқынша өмір сүріп жатыр.
Қашанда оқырманы көп киелі Түркістаннан еліміздің түкпір-түкпіріне тарап жатқан «Мархабат» журналының болашағы баянды боларына сенімім мол. Өйткені ақырын жүріп, анық басатын, көркем мінезді Махаңның, Түркі дүниесінің Тұлғасына айналған Мархабат Байғұттың шығармашылығына деген ел-жұрттың ықыласы бөлек.
Мархабат Байғұттың әр шығармасы оқырманның жүрегіне жол тапқан сияқты «Мархабат» журналы да көпшіліктің іздеп жүріп оқитын басылымына айнала бергей. Сәтімен болсын бәрі.

Мереке ҚҰЛКЕНОВ,
жазушы, ҚР Жазушылар Одағы Басқармасының төрағасы