«Мархабат» - елді мойындата бергей
Мархабат аға қалың оқырманы бар бақытты жазушы. Махаңның жазушылығын бәрі әлдеқашан-ақ мойындаған. Ел шығармаларын оқырман сүйсініп оқиды.
Қазақ әдебиетінің классиктері Тәкен Әлімқұлов, Шерхан Мұртаза, Дулат Исабеков сынды мықтылар Махаңның шығармашылығын мойындап, жылы пікірлерін аямай-ақ білдірген. Иә, олардан асырып біз не айтамыз?!
Қазақстанның халық жазушысы, Мемлекеттік сыйлықтың лауреаты Шерхан Мұртаза Мархабат Байғұтты «Бұл жазушыда жаратушы өзі бұйыртқан уыз тіл бар» деп баға берсе, Дулат Исабеков оған «Мархабат қалай жазуды, не үшін жазуды жақсы меңгерген» деп дәріптеді.
Мархабат Байғұттың кіндік қаны тамған Түлкібас ауданындағы Таупістелі ауылына 1995 жылы жазушы Шерхан Мұртаза мен өзбектің белгілі қаламгері, Қазақстан Республикасы Президенті Бейбітшілік және рухани келісім сыйлығының лауреаты Насыр Фазыл бастаған бір топ қазақ-өзбек жазушылары, ақындары бас қосып, арнайы алма ағаштар бауын отырғызған. Содан кейін бірнеше жыл қатарынан осы бақта елімізге белгілі қаламгерлер бас қосып, қазіргі әдебиеттің барысын сөз етіп, жұртпен кездесулер өткізді. Яғни, Мархабат Байғұт қос қаламгердің өнегелі өмірі мен достығын кейінгі жастарға кеңінен насихаттап, екі қаламгердің шығармашылығының шырақшысындай болып жүрді.
Осыдан тура 8 жыл бұрын, 2016 жылдың желтоқсан айында Түркияның астанасы Анкарада – Қазақстан Республикасының елшілігінде қаламгер Мархабат Байғұттың түрік тілінде жарық көрген “Дауыстың түсі” атты әңгімелер жинағының тұсаукесер рәсімі өтті. Жазушының оқырмандарға белгілі шығармалары жинақталған кітапты Қазақстанның Түркиядағы елшілігі қаржыландырып, Еуразия Жазушылар одағының “Бенгу” баспасында басылып шықты. Сол жинақты түрік тіліне аударып, баспаға дайындап ұсынғанымды мақтаныш тұтамын.
Мархабат ағаның бір ерекшелігі – үлкен қызметтерді атқарып жүріп те қаламын тастамады. Тіпті өндіріп жазды. Жыл сайын баспадан кітабы шығып жатты.
Махаңның қайраткерлік қыры туралы да көп нәрсе айтуға болады. Әсіресе, тарихы мен тағдыры ерекше Түркістан қаласының Түркі әлемінің текті төрі, мәдени-рухани астанасы атанып, ірі де іргелі облыстың орталығына айналып, көне шаһардың түрленуіне, келешегінің кемел болуына орасан зор үлес қосқан азамат.
Міне, енді сол киелі Түркістанның төрінен «Мархабат» атты журнал дүниеге келіп, туған әдебиетіміз бен руханиятымызды, мәдениетімізді дамытудың дархан дәстүрін жалғастыруды мақсат тұтып отыр екен.
Бәрекелді дей отырып сәттілік тілейміз. «Мархабат» журналын да ел мойындап, таралымы көп болғай! Қалың оқырманның іздеп жүріп оқитын басылымына айнала бергей!
Мәлік ОТАРБАЕВ,
Қазақстан Республикасы Президентінің кеңесшісі
