Мархабат ағаның рухани жолы жалғаса бергей!
Мархабат аға туралы сөз қозғағанда ойыма ардақты азаматтың биязы мінезі, сары алтындай сабырлы болмысы түседі.
Ағамыз Түркістан өңірі ғана емес, тұтас қазақ әдебиетіне, руханиятына айрықша үлес қосты.
«Оңтүстік Қазақстан» газетінде қызмет еткен кезімізде ағамызбен рухани байланысымыз бекіп, тереңдей түсті. Әр сөзін байыппен айтатын. Әзілдері де керемет еді. Нағыз зиялыға тән алғырлық, ұстазға тән даналық, қаламгерге тән қырағылыққа ие тұлға болды. Мөлдірлік пен мейірімге, адамға, қоғамға деген жанашырлық тұнып тұратын жан-дүниесі кіршіксіз таза жазушыны күллі қазақ жақсы көрді десем қателеспеймін. Өйткені, Мархабат Байғұт қаламгер ғана емес мемлекет қайраткері ретінде де биігінен түскен емес.
Ағамыздың әр апта сайын «Оңтүстік Қазақстан» газетінің сенбілік нөміріне шығатын автобиографиялық эсселері кейін «Ақтолғай» атты сүбелі дүниеге, оқырманы көп кітапқа айналды. Жаңа кітаптың, жаңа туындының туғанын көзбен көріп, ерекше сүйсіндік. Көсілте жазды, сол бір кезеңдердің естеліктерін ұрпаққа мәңгі қалдыра білді. Кейіпкерлері де өмірде бар тұлғалар болғандықтан шынайы шықты.
Мархабат ағамыздың «Ақпандағы мысықтар», «Қозапая», «Шілде», «Сырбұлақ», «Интернаттың баласы», «Нәуірзек», «Дауыстың түсі», «Қорғансыз жүрек», «Машаттағы махаббат», «Әдебиет пәнінің періштесі», «Аңсар», «Ауыл әңгімелері», «Салқын масақ», «Оқу залы», «Ақтолғай», «Сағыныш саздары», «Бұла бұлақ», «Күнгей көңіл», «Іштарлық пен құштарлық», «Аршакие» және тағыбасқа публицистикалық және прозалық кітаптары қазақ әдебиетінен ойып тұрып орын алады.
Қаламгер драма саласына да еңбек сіңірді. Оның «Бозторғайдың ұясы», «Жоғалған Жұрнақ», «Көксу комедиясы» драмалары театр сахналарында тұрақты қойылып жүр. Көрермені де көп.
Облыс орталығы Түркістанға көшіп, жаңа облыс құрылғанда ағамыз қасиетті өлкеге шынайы еңбек сіңірді. Ақылшымыз, көшбасшымыз болды. Сәбиге тән күлкісі, қарапайым болмысымен Түркістан төріндегі әдеби, рухани кештерді жүргізе білді. Елдік, бірлік, ынтымақ туралы келелі ойлар айтып, ұрпаққа жол сілтей білді.
Ағамыздың атымен жаңа журнал ашылатыны туралы ақжолтай ақпаратты қуанышпен қабылдадым. Бұл өте орынды іс. Ұлы қаламгерлердің шығармалары оның өмірін жалғайды. Менімше, Мархабат әлемі, Мархабат аға мұралары енді зерттеліп, рухани қазынасы бұдан да тереңдей түседі. Ендеше, жаңа басылымға сәттілік, әріптес журналистерге шығармашылық шабыт тілеймін. Мархабат ағамыздың рухани жолы жалғаса бергей!
Бейсенбай ТӘЖІБАЕВ,
Түркістан облысы әкімінің орынбасары
