Махаңның мәңгілік өмірі басталды деген осы...

Жыл жақсылықпен басталып жатыр екен. Жампоз журналист Оралхан Дәуіт бауырым ақжолтай хабарды сүйіншілей хабарласқанда осылай ойладым. 
Мақамы бөлек Махаңның - берісі қазақтың қадірлісі, арысы алты Алаштың ардақтысы, түгел түркіге танымал тұлға - Мархабат ағаның мәңгілік өмірі басталды деген осы. Сексен жылдығы қарсаңында журналға аты беріліп жатыр екен, қалай қуанбассың… 
Мархабат Байғұт – қазақ әдебиетінде өз өрнегімен, әсемдік әлемімен танылған, соқпағы соны, сонары олжалы, ішкі мәдениеті жоғары, Қаратаудың шертпе күйіндей күмбірлеген нәзік рухымен оқырманның жан-дүниесін баураған бекзат жазушы, сырбаз да дегдар қаламгер, шебер суреткер. Бір өзі әдеби орта қалыптастырған Махаң қоңыр қалпымен қаймана қазағы қалың, қаймағы бұзылмаған өңірдің рухани діңгегіне айналды. «Ұлысымның ұйытқысы – Оңтүстік» деген атпен көптеген кездесулер өткізді. Оңтүстік өңірінде, қайта түлеген Түркістанда кез келген игілікті шараның бел ортасында ұйытқы болып Мархабат ағаның жүргенін білеміз. 
Сондықтан бұған дейін “Тұран-Түркістан” аталып келген журналдың аты “Мархабат” болып өзгергені әбден заңдылық. Өйткені Әзірет қонған Түркістанның тұғырын биіктетуге күш салған, қаламымен де, қайраткерлігімен де кешегі Тұранның, бүгінгі Түркістанның атын ұлықтаған, “Түркілер төрі Түркістан” деп кітап жазған, шығармалары түркі тілдеріне тәржімаланған, бауырлас елдердің қаламгерлерінің басын қосып, достық дәнекеріне айналған, тамырлас жұрттың жоғары марапаты «Түркі дүниесіне қызмет» сыйлығымен марапатталған Мархабат аға Тұран-Түркістанның тұғырлы тұлғасы еді. Журналдың аты үйлесімді өзгергенімен, заты, мазмұны өзгермейді деп ойлаймын. 
Жаңа жылдан бастап “Мархабат” деп айқара ашылатын журналдың жаңа атауымен құттықтай отырып, осы игілікті іске ұйытқы болғандарға алғыс айтамын. Оқырманы көп, ғұмыры ұзақ болсын! 
Ұлы Абай аманат еткен «Ар ілімінің» жоқшысындай кісіліктің кілтін іздеген парасатты жазушы, қазақтың қасиетті қара сөзінің ақ селеулі адырында андыз-андыз із тастап, ойлы оқырманына нәр сыйлаған сөз зергері, мінезі биязы, болмысы бекзат, қаламы Қаратаудың қазынасындай құнарлы қаламгер Мархабат Байғұттың сапары ұзаққа жалғаса берері анық.

Дархан ҚЫДЫРӘЛІ,
ҚР Парламенті Сенатының депутаты