Айтары айқын – «Мархабат»

Заманның сыны, адамның міні көбейген тұста өмір кешкен Мархабат Байғұттың арманы орындалды ма, жоқ па, онысы бізге беймәлім. 
Бірақ оңтүстікте, Түркістанда оның жоқтығы білініп тұрады. Өйткені, өзіне сөзі сәйкес, ісі лайық қаламгерді, қаламының қанаты талмаған жазушыны, айтары айқын, сөзге шешен, намысы бар нар тұлғаны іздейсің. Таба алмаған соң, Махаңның мұрасына, жазып қалдырған дүниесіне қайта бір үңілесің. Жөні бөлек, тілі ерек әдеби көркем шығармалары оқырманын да, зерттеушісін де асқан сабырлы күйімен күтіп жатқандай көрінеді. 
Ал, елдің мұңын айтып, ертеңгі күнін болжаған мәнді мақалалары мен мәнзелдес көсемсөздері саналыға, көкірек көзі ояу ұрпаққа ой салады. Сараптаған тақырыптары да терең, тіршіліктің ен саласын қамтыған. 
Осынау сауапты да жауапты істі жалғастыруды қолға алған журналшыларға, жақсы бастаманы 
қолдауға ниет еткен іскер адамдарға - кәсіпкерлерге, жалпы руханият жанашырларына, оқырмандарға тілеулес болып, ақ батамызды береміз. Болар іске сәттілік тілейміз! Бастаушылар мен қоштаушылардың мақсат-мұраты берік, баянды болсын!

Дархан МЫҢБАЙ, 
мемлекет және қоғам қайраткері