Алар асуы биік болғай!

Jan 9, 2025 - 17:50
Jan 14, 2025 - 16:54
 18
Алар асуы биік болғай!

Жазушы, Халықаралық «Алаш» сыйлығының иегері Мархабат Байғұттың атында жаңа журнал ашылғалы жатыр деген жаңалық шырайлы Шымкент жұртын ғана емес, бүкіл әдебиетсүйер қауымды дүр еткізгені анық. 
Өйткені шынайылығымен өз оқырманын баурап алған Махаң көзі тірісінде адалдықтың және ұлтқа аянбай қызмет етудің озық үлгісі бола білді. Оның әрбір шығармасын тебіренбей оқу мүмкін емес. Ана тіліміздің ең мәйек сөздерін тауып жазып, әр шығармасында тіліміздің тереңдігін, ғажайып сұлулығын, кіршіксіз тазалығы мен мөлдірлігін жеткізе білгені оның хас талант иесі екенін шүбәсіз дәлелдейді.
Ендеше «Мархабат» журналының мақсаты – Мархабат Байғұттың шығармашылығын насихаттау арқылы ана тіліміздің тереңдігі, ұлт әдебиеті мен мәдениетін дамыту, таланттарды қолдау, адамдар арасында адамгершілік қасиетті насихаттау болатыны анық.
Мархабат Байғұт – Түлкібас жерінде туып-өсіп, соңғы деміне дейін туған жерін төбесіне көтеріп, әрбір талы мен тасын тәбірәк көріп, шығармасына арқау етіп өткен қаламгер. Сондай-ақ, Махаңның Шымкент қаласында ғұмыр кешіп, көптеген шығармалары осы шырайлы қалада дүниеге келіп, Шым-қаланың рухани-мәдени тұрғыда өркендеуіне де қомақты үлес қосқанын мақтаныш тұтамыз. Өзі «Қайырымды қала» атап кеткен шаһар тұрғындарының қоғамдық санасын кемелдендіру, жас ұрпақтың бойына ізгілік пен отаншылдық сезімін сіңіру жолында талмай еңбек етті.
Лайым, әдебиет айдынына қайығын енді қойып, ескегін енді салған «Мархабат» журналының алар асуы биік болғай!
Журнал жаңашыл стилімен, сүбелі ойы, салмақты пайымымен ерекшелене бергей! 
Және оқырманы көп болсын!

Сәрсен ҚҰРАНБЕК,
Шымкент қаласы әкімінің орынбасары